ബെംഗളൂരു : ഐഎസ്ആർഒ മുന്‍ ചെയര്‍മാന്‍ ഡോ. കെ. കസ്തൂരിരംഗന്‍ അന്തരിച്ചു. എൺപത്തിനാല് വയസ്സായിരുന്നു. രാവിലെ 10:45 ന് ബെംഗളൂരുവിലെ വസതിയിലായിരുന്നു അന്ത്യം. ഒൻപതുവർഷം ഐഎസ്ആർഒ ചെയർമാനായിരുന്നു.
പശ്ചിമഘട്ടസംരക്ഷണ റിപ്പോർട്ടിന്റെ പുനഃപരിശോധനയ്ക്കു നിയോഗിക്കപ്പെട്ട കമ്മിഷന്റെ ചെയർമനായിരുന്നു. സ്പേസ് കമ്മീഷൻ, കേന്ദ്ര സര്‍ക്കാരിന്റെ ബഹിരാകാശ വകുപ്പ് സെക്രട്ടറി എന്നീ നിലകളില്‍ പ്രവര്‍ത്തിച്ചിട്ടുണ്ട്.നിലവിൽ ദേശീയ വിദ്യാഭ്യാസ നയത്തിന് (എൻഇപി) ഡ്രാഫ്റ്റിംഗ് കമ്മിറ്റി ചെയർമാനായി പ്രവർത്തിച്ച് വരികയായിരുന്നു.
1940 ഒക്ടോബര്‍ 24-നാണ് കൊച്ചിയില്‍ ചിറ്റൂര്‍ റോഡിലെ സമൂഹത്ത് മഠത്തില്‍ കൃഷ്ണസ്വാമിയുടെയും വിശാലാക്ഷിയുടെയും മകനായി കസ്തൂരിരംഗൻ ജനിച്ചത്. 1994 മുതല്‍ 2003 വരെ ഒന്‍പത് വര്‍ഷം ഐഎസ്ആര്‍ഒ ചെയര്‍മാനായി അദ്ദേഹം സേവനമനുഷ്ഠിച്ച കാലഘട്ടത്തിലാണ് ഇന്ത്യയുടെ ചന്ദ്രയാത്രാപദ്ധതിയുടെ പ്രാരംഭ ആലോചന നടക്കുന്നത്. ബഹിരാകാശ മേഖലയ്‌ക്ക് അദ്ദേഹം നൽകിയ സംഭാവനകൾക്ക് പത്മശ്രീ, പത്മഭൂഷൺ, പത്മവിഭൂഷൺ എന്നിവ നൽകി രാജ്യം ആദരിച്ചിട്ടുണ്ട്.
