എടത്വ: എടത്വ സെന്റ് ജോര്ജ് ഫൊറോനാപള്ളിയില് വിശുദ്ധ ഗീവര്ഗീസ് സഹദായുടെ തിരുനാളിന് നാളെ കൊടിയേറും. രാവിലെ 5.45 ന് മധ്യസ്ഥപ്രാര്ത്ഥനയ്ക്കും, വിശുദ്ധ കുര്ബ്ബാനയ്ക്കും ശേഷം നടക്കുന്ന കൊടിയേറ്റിന് ഫാ. ജോസഫ് കളരിയ്ക്കല് മുഖ്യകാര്മികത്വം വഹിക്കും. പ്രധാന തിരുനാള് മേയ് ഏഴിനാണ്. അന്ന് ഉച്ചകഴിഞ്ഞ് നാലിന് വിശുദ്ധന്റെ തിരുസ്വരൂപവും വഹിച്ചുകൊണ്ടുള്ള ചരിത്ര പ്രസിദ്ധമായ പ്രദക്ഷിണം പള്ളിക്കുചുറ്റും നടക്കും.
മേയ് 14 ന് എട്ടാമിടത്തോടെ സമാപിക്കും.
മേയ് മൂന്നിനു രാവിലെ 5.45 ന് നടക്കുന്ന കുര്ബാനയ്ക്ക് ശേഷം വിശുദ്ധ ഗീവര്ഗീസ് സഹദായുടെ തിരുസ്വരൂപം പള്ളിയുടെ പ്രധാനകവാടത്തില് സ്ഥാപിക്കുന്നതോടെ തിരുന്നാളിന് തിരക്കേറും. നാളെ മുതല് തിരുനാള് ദിവസങ്ങളില് എല്ലാ ദിവസവും 4.30 ന്, 10 ന്, 6 ന് തമിഴ് കുര്ബാന, 5.45 ന്, 7.45 ന്, വൈകുന്നേരം നാലിന് മധ്യസ്ഥ പ്രാര്ഥന, ലദീഞ്ഞ്, കുര്ബാന, രാത്രി ഏഴിന് കുരിശടിയില് മധ്യസ്ഥ പ്രാര്ഥന എന്നിവ നടക്കും.
മെയ് ഒന്ന് മുതല് എല്ലാ ദിവസവും ഉച്ചയ്ക്ക് 2.30 ന് തമിഴില് കുര്ബാനയും നടക്കും. തിരുനാളില് പങ്കെടുക്കാനായി തീര്ത്ഥാടകര് എത്തി തുടങ്ങിയിട്ടുണ്ട്. തമിഴ്നാട്ടില് നിന്നുള്ള തീര്ത്ഥാടകരാണ് ഏറെയും എത്തുന്നത്. പള്ളിയിലെ തിരുകര്മ്മങ്ങളില് പങ്കെടുക്കാന് കന്യാകുമാരി, രാജാക്കമംഗലം, മാര്ത്താണ്ഡം തുറക്കാര് പള്ളി പരിസരങ്ങളില് തമ്പടിച്ചു തുടങ്ങി.
