കായംകുളം : ഓപ്പറേഷൻ തൂഫാന്റെ ഭാഗമായി നടത്തിയ പരിശോധനയിൽ 35.95 ഗ്രാം എം ഡി എം എ യുമായി രണ്ടു പേരെ പോലീസ് പിടികൂടി. കരുനാഗപ്പള്ളി കുലശേഖരപുരം കടത്തൂർ മുറിയിൽ ആകാശ് ഭവനം വീട്ടിൽ ആകാശ് (21) കൂട്ടാളിയായ ക്ലാപ്പന കോലെടുത്ത് വീട്ടിൽ സജി മോൻ (37) എന്നിവരെയാണ് പിടികൂടിയത്.
ഓണാഘോഷത്തോടനുബന്ധിച്ച് മയക്കു മരുന്നിന്റെ വിപണനവും ഉപയോഗവും തടയുന്നതിനായി ആലപ്പുഴ ജില്ലാ പോലീസ് മേധാവി വിഷ്ണു പ്രദീപ് ടി കെ യുടെ നിർദ്ദേശാനുസരണം കായംകുളം പോലീസ് ഉത്രാട ദിനത്തിൽ രാത്രിയിൽ നടത്തിയ വ്യാപക പരിശോധനയിലാണ് ഇവർ പിടിയിലായത്.
കായംകുളം കെഎസ്ആർടിസി പരിസരത്തു നിന്നും ആഗസ്റ്റ് 26 ന് പുലർച്ചെ മൂന്ന് മണിയോടുകൂടി സംശയാസ്പദമായ രീതിയിൽ കണ്ട മോട്ടോർ സൈക്കിളിൽ പരിശോധനയിലാണ് എംഡി എം എയുമായി ഇവർ പിടിയിലാകുന്നത്. ഓണക്കാലത്തെ വിൽപ്പന ലക്ഷ്യമിട്ടാണ് ആഭ്യന്തര വിപണിയിൽ ഏതാണ്ട് നാല് ലക്ഷത്തോളം രൂപ വില വരുന്ന മയക്കു മരുന്ന് കടത്തിയത്. കോടതിയിൽ ഹാജരാക്കിയ പ്രതികളെ റിമാന്റ് ചെയ്തു.
