കൊച്ചി: കൊച്ചി മെട്രോ റെയില്‍ ലിമിറ്റഡിന്‍റെ താല്‍ക്കാലിക മാനേജിംഗ് ഡയറക്ടറായി ജി. പ്രിയങ്ക ചുമതലയേറ്റു. എറണാകുളം ജില്ലാ കലക്ടറായ ജി പ്രിയങ്ക കെഎംആര്‍എല്‍ ഡയറക്ടര്‍ ബോര്‍ഡ് അംഗം കൂടിയാണ്. മുന്‍ സംസ്ഥാന പോലിസ് മേധാവി ലോക്നാഥ് ബെഹ്റയുടെ ഔദ്യോഗിക കാലാവധി അവസാനിച്ചതിനെ തുടര്‍ന്നാണ് നടപടി.
ഓഗസ്റ്റ് 30ന് ലോക്നാഥ് ബെഹ്റയുടെ ഔദ്യോഗിക കാലാവധി അവസാനിച്ചിരുന്നു. പുതിയ സ്ഥിരം എംഡിയെ സര്‍ക്കാര്‍ തീരുമാനിക്കുന്നതു വരെയാണ് ജി. പ്രിയങ്ക ചുമതലയില്‍ തുടരുക. 2021 ഓഗസ്റ്റിലാണ് ലോക്നാഥ് ബെഹ്റ കൊച്ചി മെട്രോയുടെ എംഡിയായി ചുമതലയേറ്റത്. രണ്ടു തവണ അദ്ദേഹത്തിന് കാലാവധി നീട്ടി നല്‍കുകയും ചെയ്തിരുന്നു.
