പത്തനംതിട്ട: ശബരിമലയിലേക്ക് 1,65,000 ലിറ്റർ നെയ്യ് പുറത്തുനിന്ന് വാങ്ങുവാൻ ദേവസ്വം ബോർഡ് തീരുമാനിച്ചു. അരവണ പ്ലാന്റ് പ്രവർത്തനം നാളെ മുതൽ ആരംഭിക്കും. മുൻതീരുമാനം തിരുത്തി ദേവസ്വം ബോർഡ്. ഇതുസംബന്ധിച്ച ടെൻഡർ ബോർഡ് ക്ഷണിച്ചു. സർക്കാർ, സഹകരണ, സ്വകാര്യ സ്ഥാപനങ്ങൾക്കും ടെൻഡറിൽ പങ്കെടുക്കാവുന്നതാണ്. തുലാമാസ പൂജകൾക്കായി നടതുറക്കുമ്പോൾ അരവണ നിർമ്മാണത്തിനുള്ള എല്ലാ സാധനസാമഗ്രികളും ഉറപ്പാക്കിയിട്ടുണ്ടെന്ന് ദേവസ്വം ബോർഡ് വ്യക്തമാക്കി.
ഇതിന്റെ ഭാഗമായി 15,000 കിലോ ഉണക്കലരി പമ്പയിലെത്തിച്ചിട്ടുണ്ട്. അരവണ നിർമ്മാണത്തിനുള്ള ശർക്കര കരാറെടുത്ത അന്നപൂർണ കമ്പനി കിലോഗ്രാമിന് 46.50 രൂപ നിരക്കിലാണ് നൽകുന്നത്. മണ്ഡല-മകരവിളക്ക് സീസണോടനുബന്ധിച്ച് ഭക്തർക്ക് തടസ്സമില്ലാതെ അരവണ പ്രസാദം ലഭ്യമാക്കാനുള്ള സജ്ജീകരണങ്ങളാണ് ദേവസ്വം ബോർഡ് ഒരുക്കിവരുന്നതെന്നും അധികൃതർ അറിയിച്ചു.
