തിരുവല്ല: ശ്രേഷ്ഠ ബസേലിയോസ് തോമസ് പ്രഥമന്‍ ബാവായുടെ വേര്‍പാട് ക്രൈസ്തവ സമൂഹത്തിന് തീരാനഷ്ടമാണെന്ന് ഡോ. തിയഡോഷ്യസ് മാര്‍ത്തോമ്മാ മെത്രാപ്പോലീത്ത. അചഞ്ചലമായ വിശ്വാസത്തിലും മൂല്യബോധത്തിലും രണ്ടു പതിറ്റാണ്ടിലധികം യാക്കോബായ സഭയെ ലക്ഷ്യ ബോധത്തോടെ നയിക്കുവാന്‍ അദ്ദേഹത്തിന് സാധിച്ചു.
ജീവിത വിശുദ്ധി, ദൈവാശ്രയബോധം, മതാതീതമായ കാഴ്ചപ്പാട് എന്നിവ ശ്രേഷ്ഠ ബാവയെ ഏറെ ജനപ്രീയനാക്കി. സംഘര്‍ഷ ഭരിതമായ കാലഘട്ടത്തില്‍, പ്രതിസന്ധികളുടെ പാരമ്യത്തില്‍, പോരാട്ടത്തിന്‍റെയും ദൈവാശ്രയത്തിന്‍റെയും വഴിയിലൂടെ സഭയെ സധൈര്യം മുന്നോട്ട് നയിക്കുവാന്‍ അദ്ദേഹത്തിന് സാധിച്ചു. ധ്യാനവും, പ്രാര്‍ത്ഥനയും, ലാളിത്യവും വിനയവും ജീവിതത്തിന്‍റെ വിജയമായി കരുതിയിരുന്നു.
പ്രതിസന്ധികളുടെ മദ്ധ്യത്തില്‍ വിശ്വാസ സമൂഹത്തോടൊപ്പം നിന്ന് അവരെ നയിച്ചു. വിശാല എക്യുമെനിക്കല്‍ മേഖലയിലും സഭൈക്യ പ്രസ്ഥാനങ്ങളിലും നല്ല നേതൃത്വം നല്കി. മാര്‍ത്തോമ്മാ സഭയുമായും സഭാ മേല്പട്ടക്കാരുമായും ഇഴയടുപ്പമുള്ള ബന്ധം അദ്ദേഹത്തിന് ഉണ്ടായിരുന്നു. ബസേലിയോസ് തോമസ് പ്രഥമന്‍ ബാവായുടെ ദേഹവിയോഗത്തില്‍ മലങ്കര മാര്‍ത്തോമ്മാ സുറിയാനിസഭയുടെ ദു:ഖവും അനുശോചനവും രേഖപ്പെടുത്തുന്നെന്നും ഡോ. തിയഡോഷ്യസ് മാര്‍ത്തോമ്മാ മെത്രാപ്പോലീത്ത പറഞ്ഞു.
