തിരുവല്ല :ബിലീവേഴ്സ് ചർച്ച് മെഡിക്കൽ കോളേജ് ആശുപത്രി സാമൂഹ്യ സേവന വിഭാഗത്തിൻറെ ആഭിമുഖ്യത്തിൽ മാർച്ച് 13ന് നടത്താൻ പോകുന്ന റിനൈസൻസ് 2026 എന്ന ശിൽപ്പശാലയുടെ വിളംബരമായി ഫ്ലാഷ് മോബും തെരുവ് നാടകവും നടന്നു. തിരുവല്ല കെഎസ്ആർടിസി സ്റ്റാൻഡിന് മുന്നിൽ ലഹരിക്കെതിരെയുള്ള ബോധവൽക്കരണ പരിപാടിയും സംഘടിപ്പിച്ചു
ആരോഗ്യമേഖലയിൽ സാമൂഹ്യപ്രവർത്തകരുടെ സ്വാധീനവും സേവനവും ഏതൊക്കെ തരത്തിലുണ്ട് എന്നതാണ് ശില്പശാലയുടെ ചർച്ചാവിഷയം. സോഷ്യൽ വർക്ക് ബിരുദ ബിരുദാനന്തര കോഴ്സ് പഠിക്കുന്ന വിദ്യാർത്ഥികളെയും ആശുപത്രിയിലെ മെഡിക്കൽ അഡ്മിനിസ്ട്രേഷൻ ജീവനക്കാരും ശില്പശാലയിൽ പങ്കെടുക്കും.
ആരോഗ്യ മേഖലയിലെ ഐ സി യു മുതൽ ഫിസിയോ തെറാപ്പി വരെ നീളുന്ന വിവിധ വിഭാഗങ്ങളിൽ സേവനമനുഷ്ഠിക്കുന്ന സാമൂഹ്യ സേവന വിഭാഗത്തിലെ പ്രഗത്ഭർ ക്ലാസുകൾ നയിക്കും. മാർച്ച് 13-ന് രാവിലെ 8 മുതൽ 2 മണി വരെ ബിലീവേഴ്സ് ആശുപത്രിയിലെ ആംഫി തിയേറ്ററിലാണ് റിനൈസൻസ് 2026 നടക്കുന്നത്.
ശില്പശാലയിൽ പങ്കെടുക്കുന്നവർക്ക് സർട്ടിഫിക്കറ്റ് നൽകുമെന്ന് ബിലീവേഴ്സ് ആശുപത്രി അധികൃതർ അറിയിച്ചു. ശില്പശാലയിൽ പങ്കെടുക്കുവാൻ രജിസ്റ്റർ ചെയ്യുന്നതിനായി 9072237111, 8606028192 എന്നീ നമ്പറുകളിൽ ബന്ധപ്പെടുക.
