തിരുവനന്തപുരം : യുഡിഎഫ് സര്ക്കാരിന്റെ തിരഞ്ഞെടുപ്പ് വാഗ്ദാനമായ പ്രിയദര്ശിനി സൗജന്യ യാത്രാ പദ്ധതിക്കു തുടക്കമായി.തമ്പാനൂര് ടെര്മിനലില് നടന്ന ഉദ്ഘാടനച്ചടങ്ങില് മുഖ്യമന്ത്രി വി.ഡി. സതീശൻ പദ്ധതിയിലെ ആദ്യ യാത്രാ ടിക്കറ്റുകൾ ഗതാഗതവകുപ്പ് മന്ത്രി സി.പി. ജോൺ, മന്ത്രി കെ.എ. തുളസി തുടങ്ങിയവരുടെ സാന്നിധ്യത്തിൽ കൈമാറി.തുടര്ന്ന് തമ്പാനൂരിൽ നിന്നുള്ള ആദ്യയാത്രയില് മുഖ്യമന്ത്രിയും ഗതാഗതമന്ത്രിയും പങ്കെടുത്തു.
ഇതൊരു അഭിമാനനിമിഷമാണെന്നും സ്ത്രീകൾക്ക് നൽകുന്ന ഒരു ഔദാര്യമായി കാണുന്നില്ലെന്നും മുഖ്യമന്ത്രി പറഞ്ഞു .ഇത് സാമൂഹികവും സാമ്പത്തികവുമായ പ്രതിഫലനങ്ങൾ ഉണ്ടാക്കും എന്ന് കരുതുന്നു .സ്വകാര്യ ബസുകാർക്ക് എന്തെങ്കിലും തരത്തിൽ നഷ്ടം ഉണ്ടായിട്ടുണ്ടെങ്കിൽ അത് പരിഹരിക്കാനുള്ള നടപടി സർക്കാർ നടത്തുമെന്നും മുഖ്യമന്ത്രി ഉറപ്പുനൽകി.
സംസ്ഥാനത്താകെ 3125 ഓർഡിനറി ബസുകളിലാണ് സൗജന്യയാത്ര. ബസുകൾ തിരിച്ചറിയാൻ പ്രിയദർശിനി സ്റ്റിക്കർ പതിച്ചിട്ടുണ്ടാകും.
