പത്തനംതിട്ട: പ്ലസ് ടൂ കഴിഞ്ഞ യുവാവിനെ വീടിനുള്ളിൽ മരിച്ച നിലയിൽ കണ്ടെത്തി. കലഞ്ഞൂർ കൂടൽ ഉദയ ജങ്ഷന് സമീപം വെട്ടുവിള പടിഞ്ഞാറ്റേൽ അഭിൽ ശിവദാസൻ ആണ് മരിച്ചത്. ഇന്ന് ഉച്ചയോടെയായിരുന്നു സംഭവം. പ്ലസ് ടു പഠനം പൂർത്തിയാക്കിയ അഭിൽ, കലഞ്ഞൂരിലെ പെട്രോൾ പമ്പിൽ ജീവനക്കാരനായി ജോലി ചെയ്യുകയായിരുന്നു.
മരിക്കുന്നതിന് തൊട്ടുമുമ്പ് അഭിൽ തന്റെ സുഹൃത്തുക്കൾക്ക് മൊബൈലിൽ സന്ദേശം അയച്ചിരുന്നതായാണ് വിവരം. സന്ദേശം കണ്ട് പരിഭ്രാന്തരായ സുഹൃത്തുക്കൾ ഉടൻ തന്നെ വീട്ടിൽ എത്തിയെങ്കിലും അഭിലിനെ തൂങ്ങിയ നിലയിൽ കണ്ടെത്തുകയായിരുന്നു. ഈ സമയം വീട്ടിൽ മറ്റാരും ഉണ്ടായിരുന്നില്ല.
ഉടൻ തന്നെ പത്തനാപുരത്തെ സ്വകാര്യ ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല. നിലവിൽ പത്തനാപുരത്തെ സ്വകാര്യ ആശുപത്രിയിലുള്ള മൃതദേഹം തുടർനടപടികൾക്കായി കോന്നി മെഡിക്കൽ കോളേജ് ആശുപത്രിയിലേക്ക് മാറ്റും. കൂടൽ പോലീസ് അന്വേഷണം ആരംഭിച്ചു.
