കോഴഞ്ചേരി : സംസ്ഥാനത്തെ റോഡപകടങ്ങൾ ഒഴിവാക്കാനും ഗതാഗത കുരുക്ക് നിയന്ത്രിക്കാനും സർക്കാർ നടപ്പാക്കുന്ന സമഗ്ര വികസന പദ്ധതിയിൽ ഇനി കോഴഞ്ചേരി ടൗണും ഉൾപ്പെടും. കേരളത്തിലെ 21 ടൗണുകൾ ആധുനിക രീതിയിൽ വികസിപ്പിക്കുന്നതിൻ്റെ ഭാഗമായാണ് കോഴഞ്ചേരി ടൗണിനെയും ഉൾപ്പെടുത്തിയിരിക്കുന്നത്. ഇതിനായുള്ള വിശദമായ പദ്ധതിരേഖ പൊതുമരാമത്ത് നിരത്ത് വിഭാഗം തയ്യാറാക്കി തുടങ്ങി.
കോഴഞ്ചേരിയിലെ വണ്ടിപ്പേട്ട, പഴയ പാലം ടൗണിലേക്ക് വന്നിറങ്ങുന്ന ഇടം, സി. കേശവൻ സ്ക്വയറിന് സമീപം എന്നീ ഭാഗങ്ങൾ ഉൾപ്പെടുത്തിയാണ് ടൗൺ നവീകരിക്കുന്നത്.
ഇതിന് പുറമെ ടിബി ജംഗ്ഷൻ മുതൽ വണ്ടിപ്പേട്ട വരെ വൺവേ റോഡ് വീതി കൂട്ടാനുള്ള ശുപാർശയും നൽകിയിട്ടുണ്ടെന്ന് പൊതുമരാമത്ത് നിരത്ത് വിഭാഗം ഉദ്യോഗസ്ഥർ അറിയിച്ചു. പദ്ധതി റിപ്പോർട്ട് കൈമാറുന്ന മുറയ്ക്ക് കിഫ്ബി ആവശ്യമായ തുക അനുവദിക്കും. പൊതുമരാമത്ത് ഡിസൈൻ വിഭാഗമാണ് റിപ്പോർട്ട് തയ്യാറാക്കുന്നത്
