കോട്ടയം : വാഗമണ്ണിൽ വിനോദ സഞ്ചാരികളായ കുടുംബത്തെയും ഒപ്പമുണ്ടായിരുന്ന ഭിന്നശേഷിക്കാരായവരെയും ആക്രമിച്ച സംഭവത്തിൽ പ്രതിഷേധവുമായി ഹോട്ടൽ ആന്റ് റസ്റ്ററന്റ് അസോസിയേഷൻ. കഴിഞ്ഞ 24 നാണ് ഈരാറ്റുപേട്ട നടയ്ക്കൽ വെളിയത്ത് വീട്ടിൽ സാദിക്കിനെയും കുടുംബാംഗങ്ങളെയും അക്രമി സംഘം ആക്രമിച്ചത്.
കാർ ദിശതെറ്റി എത്തിയതായി ആരോപിച്ചാണ് ആക്രമണം നടത്തിയത്. സംഭവത്തിൽ കുറ്റക്കാരായവർക്കെതിരെ ശക്തമായ നടപടിയെടുക്കണമെന്ന് അസോസിയേഷൻ ആവശ്യപ്പെട്ടു. വിനോദസഞ്ചാരത്തിന് എത്തുന്ന സാധാരണക്കാരെ ഇത്തരത്തിൽ ആക്രമിക്കുന്നത് വിനോദ സഞ്ചാര മേഖലയെയും ഇതിനെ ആശ്രയിച്ച് കഴിയുന്ന സാധാരണക്കാരായ ആളുകളെയും ദുരിതത്തിലാക്കും. ഇത് ഇവരുടെ ഉപജീവനമാർഗം തന്നെ ഇല്ലാതാക്കും.
ഈ സാഹചര്യത്തിൽ അടിയന്തിരമായി സർക്കാർ ഈ വിഷയത്തിൽ ഇടപെട്ട് വിനോദ സഞ്ചാര മേഖലകളിലെ ഇത്തരം അക്രമങ്ങൾ ഇല്ലാതാക്കാൻ നടപടി സ്വീകരിക്കണമെന്നും അസോസിയേഷൻ ആവശ്യപ്പെട്ടു.യോഗത്തിൽ ജില്ലാ പ്രസിഡന്റ് കെ.കെ ഫിലിപ്പുകുട്ടി, ജില്ലാ സെക്രട്ടറി ഷാഹുൽ ഹമീദ്, സംസ്ഥാന സെക്രട്ടറി എൻ.പ്രതീഷ്, സംസ്ഥാന കമ്മിറ്റി അംഗങ്ങളായ മുഹമ്മദ് ഷെരീഫ്, അൻസാരി, ബോബി തോമസ്, വർക്കിംങ് പ്രസിഡന്റ് ബിജോയ് ജോർജ് എന്നിവർ പ്രസംഗിച്ചു
