പത്തനംതിട്ട : പതിനാലുകാരന്റെ നഷ്ടപ്പെട്ട സൈക്കിൾ കണ്ടുപിടിച്ചു നൽകി പന്തളം പോലീസ് .കുളനട ഗവണ്മെന്റ് ഹൈസ്കൂളിലെ ഒമ്പതാം ക്ലാസ്സ് വിദ്യാർത്ഥി അഭിജിത്തിന്റെ വീട്ടുമുറ്റത്ത് വച്ച സൈക്കിളാണ് വെള്ളിയാഴ്ച (24) മുതൽ നഷ്ടപ്പെട്ടത് .സ്റ്റുഡന്റ് പോലീസ് കേഡറ്റ് കൂടിയാണ് അഭിജിത് .കുളനട സ്റ്റാൻഡിലെ ടാക്സിഡ്രൈവറായ അഭിജിത്തിന്റെ അച്ഛൻ രത്നാകരൻ പന്തളം പോലീസ് സ്റ്റേഷനിൽ പരാതി നൽകി.
പരാതിക്ക് മുന്തിയ പരിഗണന നൽകിയ പോലീസ് ഇൻസ്‌പെക്ടർ റ്റി ഡി പ്രജീഷ് സൈക്കിൾ കണ്ടെത്താനുള്ള ദൗത്യം സി പി ഓമാരായ എസ് അൻവർഷായെയും കെ അമീഷിനെയും ഏൽപ്പിച്ചു. വ്യാപകമാക്കിയ തെരച്ചിലിനൊടുവിൽ രാത്രി വൈകി പന്തളം വലിയ പാലത്തിനു സമീപമുള്ള കടവിന്റെ ഭാഗത്ത് ഒളിപ്പിച്ച നിലയിൽ സൈക്കിൾ കണ്ടെത്തി. 27 ന് രാവിലെ അച്ചനെയും മകനെയും സ്റ്റേഷനിൽ വിളിച്ചുവരുത്തി സൈക്കിൾ തിരികെ പോലീസ് ഏൽപ്പിച്ചു.
