ആലപ്പുഴ: കേരള നിയമസഭ തിരഞ്ഞെടുപ്പിൽ ഹരിത പ്രോട്ടോക്കോൾ സന്ദേശം വോട്ടർമാരിലേക്ക് എത്തിക്കുന്നതിനായി ആലപ്പുഴയിൽ ‘ഹരിത വഞ്ചി’ പ്രയാണം ആരംഭിച്ചു. കുട്ടനാടൻ പഞ്ചായത്തുകളിലെയും ആലപ്പുഴ നഗരസഭയിലെയും ഉൾപ്രദേശങ്ങളിലെ വോട്ടർമാരിലേക്ക് പരിസ്ഥിതി സൗഹൃദ തിരഞ്ഞെടുപ്പ് എത്തിക്കുക എന്ന ലക്ഷ്യത്തോടെയാണ് ഈ വേറിട്ട പ്രചാരണ പരിപാടി സംഘടിപ്പിച്ചിരിക്കുന്നത്.
പ്ലാസ്റ്റിക് ഉൾപ്പെടെയുള്ള അജൈവ മാലിന്യങ്ങൾ തിരഞ്ഞെടുപ്പ് വേളയിൽ ഒഴിവാക്കേണ്ടതിന്റെ പ്രാധാന്യം വിളിച്ചോതുന്ന മൈക്ക് അനൗൺസ്‌മെന്റുകളും ബോധവൽക്കരണ ലഘുലേഖകളുടെ വിതരണവും ഹരിത വഞ്ചിയിൽ സജ്ജീകരിച്ചിട്ടുണ്ട്.
ഹരിത വഞ്ചി യാത്രയുടെ ഫ്ലാഗ് ഓഫ് കർമ്മം ഡെപ്യൂട്ടി കളക്ടർ ആശ സി. എബ്രഹാം നിർവ്വഹിച്ചു. ശുചിത്വ മിഷൻ ജില്ലാ കോർഡിനേറ്റർ ഷിൻസ് ഡി. ചടങ്ങിൽ സ്വാഗതം ആശംസിച്ചു. മുൻസിപ്പൽ സെക്രട്ടറി എസ്. സനിൽ, നഗരസഭ നോഡൽ ഓഫീസർ സി. ജയകുമാർ, ശുചിത്വ മിഷൻ ജില്ലാ അസിസ്റ്റന്റ് കോർഡിനേറ്റർ വി. രേവതി എന്നിവർ സംസാരിച്ചു.
ആലപ്പുഴയുടെ തനതായ ഭൂപ്രകൃതിക്ക് അനുയോജ്യമായ രീതിയിൽ ജലഗതാഗതത്തിലൂടെയുള്ള ഈ പ്രചാരണ രീതിക്ക് വലിയ ജനപിന്തുണയാണ് ലഭിക്കുന്നത്. വരും ദിവസങ്ങളിലും വിവിധ ഉൾനാടൻ കേന്ദ്രങ്ങളിൽ ഹരിത വഞ്ചി പര്യടനം നടത്തും.
