ന്യൂഡല്‍ഹി : പെരുന്ന മന്നം സ്മൃതി എല്ലാവര്‍ക്കുമുള്ള ഇടമാണെന്ന് ഉപരാഷ്‌ട്രപതി സി പി രാധാകൃഷ്ണന്‍. ഡല്‍ഹിയിലെ മന്നം സ്മൃതി മണ്ഡപത്തിന്റെ ഉദ്ഘാടനം നിര്‍വഹിച്ച് സംസാരിക്കുക ആയിരുന്നു അദ്ദേഹം. ഇന്നയാള്‍ വരേണ്ട. ഇന്നയാള്‍ വരണം എന്ന് താന്‍ തീരുമാനിക്കും എന്ന ചിന്ത ഒരാള്‍ക്കും പാടില്ല. എന്‍എസ്എസ് ജനറല്‍ സെക്രട്ടറി ജി സുകുമാരന്‍നായരെ പേരെടുത്ത് പറയാതെ ആയിരുന്നു ഉപരാഷ്‌ട്രപതിയുടെ വിമര്‍ശനം.
ഡല്‍ഹിയിലെ എന്‍എസ്എസ് കൂട്ടായ്‌മയുടെ നേതൃത്വത്തിലാണ് ദ്വാരകയില്‍ മന്നം സ്മൃതി മണ്ഡപം നിര്‍മിച്ചത്. പെരുന്ന സ്വയം ശുദ്ധീകരിക്കപ്പെടുമെന്ന് കേന്ദ്രസഹമന്ത്രി സുരേഷ് ഗോപിയും പറഞ്ഞു. എന്നാല്‍ വിമര്‍ശനങ്ങളോട് ജി സുകുമാരന്‍ നായര്‍ പ്രതികരിച്ചിട്ടില്ല. ഇക്കഴിഞ്ഞ ഫെബ്രുവരിയില്‍ ചങ്ങനാശേരിയില്‍ എത്തിയ ഉപരാഷ്‌ട്രപതിയ്‌ക്ക് മന്നം സമാധിയില്‍ പുഷ്പാര്‍ച്ചനയ്‌ക്ക് അനുമതി ലഭിച്ചിരുന്നില്ല.
സുരക്ഷാക്രമീകരണങ്ങള്‍ ബുദ്ധമുട്ടുണ്ടാക്കുമെന്ന് കാട്ടിയായിരുന്നു തടസപ്പെട്ടത്. പെരുന്നയിലെ മന്നം സമാധിയില്‍ പുഷ്പാര്‍ച്ചനയ്‌ക്ക് അനുമതി നിഷേധിച്ചെന്ന് പരാതിപ്പെട്ട പശ്ചിമബംഗാള്‍ മുന്‍ ഗവര്‍ണര്‍ സി വി ആനന്ദബോസിന്റെ നിര്‍ദേശം കണക്കിലെടുത്താണ് ഡല്‍ഹിയില്‍ മന്നം സ്മൃതിമണ്ഡപം നിര്‍മ്മാണത്തിലേക്ക് കടന്നത്.
