കോട്ടയം: മഹാത്മാ ഗാന്ധി സർവകലാശാലയിൽ നടന്ന അന്തർദേശീയ സെമിനാറിൽ കാണക്കാരി സിഎസ്ഐ ലോ കോളേജ് വിദൃാർത്ഥി ഡോ. ജോസഫ് പി. വർഗീസ് “സംഘർഷങ്ങളുടെ യുഗത്തിലെ സുസ്ഥിര ഭാവി – പരിസ്ഥിതി നിയമം, ഭരണനിർവഹണം, പുനരുപയോഗ ഊർജ സാങ്കേതികവിദ്യകൾ എന്നിവയുടെ സംയോജനം” എന്ന വിഷയത്തിൽ അവതരിപ്പിച്ച പ്രബന്ധം ശ്രദ്ധേയമായി.
ആധുനിക ലോകം നേരിടുന്ന ഭൂ-രാഷ്ട്രീയ, കാലാവസ്ഥാ, ഊർജ, വിഭവ, ഭരണ, വികസന, തലമുറ സംഘർഷങ്ങൾ സുസ്ഥിര വികസനത്തിന് വലിയ വെല്ലുവിളികളാണെന്ന് അദ്ദേഹം ചൂണ്ടിക്കാട്ടി. പരിസ്ഥിതി നിയമം, നല്ല ഭരണനിർവഹണം, സാങ്കേതിക നവീകരണം, ജന പങ്കാളിത്തം എന്നിവയുടെ സംയോജിത സമീപനമാണ് സുസ്ഥിര ഭാവിയുടെ അടിത്തറയെന്ന് അദ്ദേഹം വൃക്തമാക്കി.
ഇന്ത്യൻ ഭരണഘടനയിലെ അനുച്ഛേദങ്ങൾ 14, 21, 48A, 51A(g) എന്നിവയും സുപ്രധാന പരിസ്ഥിതി വിധിന്യായങ്ങളും പരിസ്ഥിതി സംരക്ഷണത്തിന് ശക്തമായ നിയമപരമായ പിന്തുണ നൽകുന്നുവെന്ന് അദ്ദേഹം വിശദീകരിച്ചു.
സ്റ്റോക്ക്ഹോം സമ്മേളനം, റിയോ ഉച്ചകോടി, പാരീസ് കരാർ എന്നിവയിലെ ഇന്ത്യയുടെ പ്രതിബദ്ധതയും സുസ്ഥിര വികസന ലക്ഷ്യങ്ങളും പ്രബന്ധത്തിൽ പ്രതിപാദിച്ചു. ക്രോസ് വെന്റിലേഷനും കൊതുകുവല ഘടിപ്പിച്ച ജനലുകളും ഉപയോഗിച്ചുള്ള വീടിന്റെ രൂപകൽപ്പന എയർ കണ്ടീഷണറുകളുടെ ഉപയോഗം കുറച്ച് ഊർജ സംരക്ഷണം സാധ്യമാക്കുന്നതായി അദ്ദേഹം ചൂണ്ടികാട്ടി.
ഡോ. മഞ്ജുഷ കെ. എ. (അസി.പ്രൊഫസർ, എസ് ജീ റ്റി ഡി എസ്, എം ജീയു) സമ്മേളനത്തിന് നേതൃത്വം നൽകി. പങ്കെടുത്ത പ്രബന്ധാവതാരകർക്കും പ്രതിനിധികൾക്കും സർട്ടിഫിക്കറ്റുകൾ വിതരണം ചെയ്തു. രാജ്യത്തിന്റെ വിവിധ സർവകലാശാലകളെ പ്രതിനിധീകരിച്ച് എത്തിയ ഗവേഷകരും വിദ്യാർത്ഥികളും അധ്യാപകരും പരിപാടിയിൽ പങ്കെടുത്തു
