ചങ്ങനാശ്ശേരി : മരിയന്‍ ലൈനിലെ 16 കുടുംബങ്ങള്‍ക്ക് അപകട ഭീഷണി ഉയര്‍ത്തി 60 അടിയോളം ഉയരത്തില്‍ 300 മീറ്റര്‍ നീളത്തില്‍ നില്‍ക്കുന്ന മണ്‍തിട്ട നീക്കുംവരെ സമരം തുടരുമെന്ന് കേരളാ കോണ്‍ഗ്രസ് വൈസ് ചെയര്‍മാന്‍ വി.ജെ.ലാലി പറഞ്ഞു. മരിയന്‍ ലൈന്‍ സംരക്ഷണ സമിതിയുടെ ആഭിമുഖ്യത്തില്‍ അപകട ഭീഷണിയായി നില്‍ക്കുന്ന മണ്‍തിട്ട നീക്കണമെന്നാവശ്യപ്പെട്ടുകൊണ്ട് മാടപ്പള്ളി പഞ്ചായത്ത് പടിക്കല്‍ നടത്തിയ പ്രതിഷേധ ധര്‍ണ്ണ ഉദ്ഘാടനം ചെയ്തു സംസാരിക്കുകയായിരുന്നു അദ്ദേഹം.
സംരക്ഷണ സമിതി ചെയര്‍മാന്‍ ബാബു കുട്ടന്‍ചിറയുടെ അദ്ധ്യക്ഷതയില്‍ സമരസമിതി രക്ഷാധികാരി ബ്ലോക്ക് പഞ്ചായത്ത് മെമ്പര്‍ അശോക് ജി. തുടര്‍സമര പ്രഖ്യാപനം നടത്തി. വാര്‍ഡ് മെമ്പര്‍ സൈനാ തോമസ്, ബ്ലോക്ക് പഞ്ചായത്ത് മെമ്പര്‍ സെലിന്‍ ബാബു, പഞ്ചായത്ത് മെമ്പര്‍ ബിന്ദു ജോസഫ്, ബിജെപി സംസ്ഥാന കൗണ്‍സില്‍ അംഗം വി.പി. വിനയകുമാര്‍, എസ്,യു.സി.ഐ ജില്ലാ കമ്മറ്റിയംഗം കെ.എന്‍. രാജന്‍, ബിജെപി എസ്.സി. മോര്‍ച്ച ജില്ലാ വൈസ് പ്രസിഡന്റ് മുരളീധരന്‍ വി, ഫിലോമിന തോമസ്, ബിന്‍സി ബിനോയ്, അജേഷ് ആന്റണി എന്നിവര്‍ പ്രസംഗിച്ചു.
