കൊച്ചി : എറണാകുളം പനമ്പള്ളിനഗറിലെ വിദ്യാനഗറിൽ റോഡിൽ നവജാത ശിശുവിന്റെ മൃതദേഹം കണ്ടെത്തിയ സംഭവത്തിൽ കുറ്റം സമ്മതിച്ച് 23-കാരിയായ യുവതി. സമീപത്തെ ഫ്ലാറ്റിലെ താമസക്കാരിയായ അമ്മ പ്രസവിച്ചു മൂന്ന് മണിക്കൂറിനുള്ളിൽ കുഞ്ഞിനെ റോഡിലേയ്ക്ക് എറിയുകയായിരുന്നുവെന്ന് കൊച്ചി സിറ്റി പൊലീസ് കമ്മീഷണർ മാധ്യമങ്ങളോട് പറഞ്ഞു. യുവതി ലൈംഗിക പീഡനത്തിന് ഇരയായതായി സംശയിക്കുന്നതായും കമ്മീഷണർ വ്യക്തമാക്കി.
യുവതി ഗര്ഭണിയായിരുന്നുവെന്ന കാര്യവും പ്രസവിച്ച കാര്യവും രക്ഷിതാക്കള്ക്ക് അറിയില്ലായിരുന്നുവെന്നും കമ്മിഷണര് അറിയിച്ചു. ഇന്ന് പുലർച്ചെ അഞ്ച് മണിയോടെ ആയിരുന്നു പ്രസവം. പെട്ടെന്നുണ്ടായ പരിഭ്രമത്തിൽ കുഞ്ഞിനെ താഴെയ്ക്ക് എറിയുകയായിരുന്നുവെന്ന് യുവതി പൊലീസിന് മൊഴി നൽകി.
കുഞ്ഞിനെ താഴേക്ക് എറിഞ്ഞത് ആമസോണിന്റെ പാർസൽ കവറിലാണ്. കവറിലെ ബാർ കോഡ് സ്കാൻ ചെയ്തപ്പോഴാണ് ഫ്ലാറ്റിലെ താമസക്കാരിലേക്ക് അന്വേഷണം നീങ്ങിയത്. യുവതിയെ വൈദ്യ പരിശോധനയ്ക്കായി എറണാകുളം ജനറൽ ആശുപത്രിയിലേക്ക് മാറ്റി.
