കോട്ടയം : മലങ്കര ഓർത്തഡോക്സ് സുറിയാനി സഭയുടെ പരിശുദ്ധനായ വട്ടശ്ശേരിൽ ഗീവർഗീസ് മാർ ദിവന്നാസിയോസ് തിരുമേനിയുടെ 92ാം ഓർമ്മപ്പെരുന്നാൾ ഫെബ്രുവരി 22 മുതൽ 28 വരെ കോട്ടയം പഴയസെമിനാരിയിൽ നടക്കും. പെരുന്നാൾ ശുശ്രൂഷകൾക്ക് മലങ്കരസഭയുടെ പരമാധ്യക്ഷനും മലങ്കര മെത്രാപ്പോലീത്തായുമായ പരിശുദ്ധ ബസേലിയോസ് മാർത്തോമ്മാ മാത്യൂസ് തൃതീയൻ കാതോലിക്കാ ബാവാ മുഖ്യകാർമ്മികത്വം വഹിക്കും.
സഭയുടെ മെത്രാപ്പോലീത്താമാർ സഹകാർമ്മികരാകും. ഒരുക്കങ്ങൾ വിലയിരുത്തുന്നതിനായി കോട്ടയം ഭദ്രാസനാധിപൻ ഡോ.യൂഹാനോൻ മാർ ദീയസ്ക്കോറോസ് മെത്രാപ്പോലീത്തായുടെ അധ്യക്ഷതയിൽ സഭാ ആസ്ഥാനത്ത് യോഗം ചേർന്നു.
ഫാ.കെ.എം.സഖറിയ, ഫാ.തോമസ് ജോർജ്, പ്രസാദ് ഏബ്രഹാം നെൽപ്പുര എന്നിവർ കൺവീനർമാരായി വിവിധ കമ്മിറ്റികൾ രൂപീകരിച്ചു. സഭയുടെ വിവിധ പ്രസ്ഥാനങ്ങളുടെ പ്രതിനിധികൾ യോഗത്തിൽ പങ്കെടുത്തു. ഓർമ്മപ്പെരുന്നാളിന്റെ ഭാഗമായി കൺവൻഷൻ, ഗാനശുശ്രൂഷ, ചരിത്ര സെമിനാർ, ആത്മീയ പ്രസ്ഥാനങ്ങളുടെ സമ്മേളനങ്ങൾ, ഭവന സഹായ വിതരണം, അഖില മലങ്കര ഉപന്യാസ-ക്വിസ് മത്സരങ്ങൾ, പ്രബന്ധ മത്സരം എന്നിവ നടക്കുമെന്ന് കോട്ടയം പഴയ സെമിനാരി മാനേജർ ഫാ.ജോബിൻ വർഗീസ് അറിയിച്ചു.
