കൊച്ചി : മലയാള സിനിമയിൽ ശ്രദ്ധേയമായ ഒട്ടേറെ ക്ലാസിക്കുകൾക്ക് ജന്മം നൽകിയ സംവിധായകൻ അടൂർ ഗോപാലകൃഷ്ണനും മെഗാസ്റ്റാർ മമ്മൂട്ടിയും മൂന്ന് പതിറ്റാണ്ടിലേറെ നീണ്ട ഇടവേളയ്ക്കുശേഷം വീണ്ടും ഒന്നിക്കുന്ന ‘പദയാത്ര’ ഡിസംബർ നാലിന് ലോകമെമ്പാടുമുള്ള തിയറ്ററുകളിൽ റിലീസ് ചെയ്യും
32 വർഷങ്ങൾക്കുശേഷമാണ് ഇരുവരും ഒരുമിക്കുന്നത്. മമ്മൂട്ടി കമ്പനിയുടെ ബാനറിൽ മമ്മൂട്ടി തന്നെ നിർമിക്കുന്ന ചിത്രത്തിന്റെ ട്രെയിലറും നേരത്തേ പുറത്തിറങ്ങിയിരുന്നു.
മലയാള സിനിമയിൽ വേറിട്ട ആഖ്യാനശൈലിയും ശക്തമായ സാമൂഹിക നിരീക്ഷണങ്ങളും കൊണ്ട് ശ്രദ്ധേയനായ അടൂർ ഗോപാലകൃഷ്ണന്റെ തിരിച്ചുവരവെന്ന പ്രത്യേകതയും ചിത്രത്തിനുണ്ട്. അഭിനയമികവുകൊണ്ട് മലയാള സിനിമയുടെ ചരിത്രത്തിൽ ഇടം നേടിയ മമ്മൂട്ടിയും അടൂരും വീണ്ടും ഒന്നിക്കുമ്പോൾ വലിയ പ്രതീക്ഷയോടെയാണ് സിനിമാപ്രേമികൾ ‘പദയാത്ര’യ്ക്കായി കാത്തിരിക്കുന്നത്.
ഒരു ഡോക്ടറുടെ ജീവിതത്തെ കേന്ദ്രമാക്കിയാണ് ‘പദയാത്ര’യുടെ കഥ വികസിക്കുന്നത്. ദേവദാസ് എന്ന ഡോക്ടറുടെ വേഷത്തിലാണ് മമ്മൂട്ടി ചിത്രത്തിൽ എത്തുന്നത്. ജീവിതത്തിലും തൊഴിൽരംഗത്തും ധാർമികതയ്ക്കും സത്യസന്ധതയ്ക്കും പ്രാധാന്യം നൽകുന്ന വ്യക്തിയുടെ ജീവിതത്തിലൂടെ സാമൂഹികവും രാഷ്ട്രീയവുമായ വിഷയങ്ങൾ അവതരിപ്പിക്കുന്ന ചിത്രമാണിതെന്നാണ് പുറത്തുവന്ന വിവരങ്ങൾ സൂചിപ്പിക്കുന്നത്.
ദരിദ്രമായ കുടുംബപശ്ചാത്തലത്തിൽനിന്ന് കഠിനാധ്വാനത്തിലൂടെ ഡോക്ടറായിത്തീരുന്ന ദേവദാസിന്റെ ജീവിതവും അയാൾ നേരിടുന്ന വെല്ലുവിളികളുമാണ് ചിത്രത്തിന്റെ പ്രധാന പ്രമേയം. ഒരു വ്യക്തിയുടെ ധാർമിക നിലപാടുകളും സാമൂഹിക സാഹചര്യങ്ങളും തമ്മിലുള്ള സംഘർഷങ്ങൾക്ക് പ്രാധാന്യം നൽകുന്ന അടൂർ ശൈലിയിലുള്ള സിനിമാനുഭവമാണ് ‘പദയാത്ര’.
