തിരുവനന്തപുരം : ലോക കേരളസഭ തുടരില്ലെന്ന നിലപാടില്‍ മാറ്റമില്ലെന്ന് മുഖ്യമന്ത്രി വി.ഡി.സതീശന്‍. ലോക കേരളസഭ തുടരില്ലെന്നത് യുഡിഎഫിൻറെ രാഷ്ട്രീയ തീരുമാനമാണെന്നും അതിൽ മാറ്റമില്ലെന്നും മുഖ്യമന്ത്രിയുടെ ഓഫീസ് പുറത്തിറക്കിയ വാർത്താ കുറിപ്പിൽ പറയുന്നു.കേരളസഭയുടെ നിർദേശങ്ങൾ പ്രാവർത്തികമാക്കാനും ഭരണപരമായ ചെലവുകൾക്കുമായി 2 കോടി രൂപ അനുവദിച്ചത് വിവാദമായ പശ്ചാത്തലത്തിലാണ് വിശദീകരണം.
നിലവിൽ ലോക കേരളസഭക്ക് സെക്രട്ടറിയേറ്റുണ്ട്. അതിൻറെ ചെലവുകൾക്കും നോർക്ക വഴിയുള്ള ബിസിനസ് ലീഡർഷിപ്പ് മീറ്റിനുമാണ് പണം അനുവദിച്ചതെന്ന് മുഖ്യമന്ത്രി വ്യക്തമാക്കി.പ്രവാസികളുടെ പങ്കാളിത്തത്തോടെ കേരള വികസനം ലക്ഷ്യമിട്ടുള്ള മറ്റൊരു പദ്ധതി സർക്കാറിന്‍റെ പരിഗണനയിലുണ്ടെന്നും മുഖ്യമന്ത്രി അറിയിച്ചു.
