അടൂർ : അടൂർ പൊലീസ് സ്റ്റേഷനിൽ കോൺഗ്രസ് ജില്ലാ പഞ്ചായത്തംഗം ശ്രീനാദേവി കുഞ്ഞമ്മയുടെ നേതൃത്വത്തിൽ പ്രവർത്തകർ ലോക്കപ്പിൽ കയറി യൂട്യൂബറെ ഭീഷണിപ്പെടുത്തിയ ദൃശ്യങ്ങൾ പുറത്ത്.കഴിഞ്ഞ ജൂലൈ 11 നടന്ന സംഭവത്തിന്റെ പോലീസ് സ്റ്റേഷനിലെ സിസിടിവി ദൃശ്യങ്ങൾ ആണ് ഇപ്പോൾ പുറത്തുവന്നത്
സമൂഹമാധ്യമങ്ങളിൽ ശ്രീനാദേവിക്കെതിരെ അപകീർത്തികരമായ പ്രചരണം നടത്തിയെന്ന പരാതിയിൽ അറസ്റ്റിലായ യുട്യൂബർ രാജൻ ജോസഫിനെ പൊലീസ് അറസ്റ്റ് ചെയ്ത് സ്റ്റേഷനിലെത്തിച്ചപ്പോഴായിരുന്നു അക്രമമുണ്ടായത് .സംഘത്തിൽ രാഹുൽ മാങ്കൂട്ടത്തിലിന്റെ അടുത്ത അനുയായിയായ ഫെന്നി നൈനാനും ഉൾപ്പെട്ടിട്ടുണ്ട്.
രാജൻ ജോസഫിനെ കൊച്ചിയിൽ നിന്ന് അടൂരിലേക്കു കൊണ്ടുവന്ന പൊലീസ് ജീപ്പ് സ്റ്റേഷനിലെത്തിയപ്പോൾ തടഞ്ഞുനിർത്തിയ ശേഷം ഇയാളെ ആക്രമിക്കാൻ ശ്രമിക്കുന്നതും പിന്നീട് സെല്ലിനുള്ളിൽ കിടക്കുന്ന രാജൻ ജോസഫിനോട് സംസാരിക്കുന്നതും തട്ടിക്കയറുന്നതും ദൃശ്യങ്ങളിൽ വ്യക്തമാണ് .രണ്ടു പോലീസുകാർക്ക് ഉൾപ്പെടെ പരിക്കേറ്റ സംഭവത്തിൽ അന്ന് കണ്ടാലറിയാവുന്ന 20 പേർക്കെതിരെ പോലീസ് കേസെടുത്തിരുന്നു.
